దిగ్భ్రమపరిచే కొన్ని వాస్తవాలు

నా స్నేహితుడి పుణ్యమాని ఈ వారం కొన్ని విభ్రాంతికరమైన వాస్తవాలు తెలుసుకున్నాను. అందులో చాలా విషయాలు నాకు తెలియనివి, బాల్యంలో జరిగినవి. ఇంత వివరంగా ఏ రోజూ  చదివిన విన్న పాపాన పోలేదు. నాలాంటి వాళ్ళు చాలా మంది ఉండే అవకాశాలున్నాయి కాబట్టి వాళ్ళంతా ఈ టపా చదివి మనల్ని ఉద్ధరించటానికి కంకణం కట్టుకున్న దేశనాయకులు ఎంతటి గొప్పవాళ్ళో,  సోనియా గాంధీ, రాహుల్‌గాంధీల చరిత్ర ఎటువంటిదో, ఎంతటి అనుమానాస్పద జీవితాలు గడుపుతూ  దేశ రాజకీయాలను, ప్రజాజీవితాన్ని ప్రభావితం చేస్తున్నారో తెలుసుకుంటారని ఆశిస్తాను. దేశప్రయోజనాలను పణంగా పెట్టి వీళ్ళు దోచుకుంటున్న విధానం చూస్తుంటే అసహ్యం కలగక మానదు. యావద్భారతం ఎంతలా అవినీతి ఊబిలో కూరుకుపోయిందో అర్థమవుతుంది. 'చల్తా హై యార్ ' అనే మనస్త్వతం పోనంతవరకూ మనకీ గతి తప్పదు. వాస్తవానికి ఈ టపాలో ఉన్న సమాచారమంతా జనతాపార్టీ అధ్యక్షుడైన సుబ్రహ్మణ్యస్వామి వెబ్‌సైట్ నుంచి, ఆయన వీడియోల(యూట్యూబ్) నుంచి సేకరించినదే. చదువరుల సౌకర్యార్థం దాన్నే  పాయింట్స్‌గా విడగొట్టాను.




 సుబ్రహ్మణ్యస్వామి జనతాపార్టీ వ్యవస్థాపకులలో ఒకరు.Indian Statistical Institute కలకత్తాలో గణాంకశాస్త్రం(Statistics)లో పి.జి.చేసి స్కాలర్‌షిప్ ద్వారా  ప్రఖ్యాత హార్వర్డ్ విశ్వవిద్యాలయం నుంచి అర్థశాస్త్రం(ఎకనమిక్స్)లో డాక్టరేట్ పొందారు. నోబెల్‌బహుమతి గ్రహీతలైన సైమన్ కజ్‌నట్స్, పౌల్‌సామ్యెల్సన్‌తో కలిసి అనేక వ్యాసాలు సమర్పించారు. చాలా సంవత్సరాలపాటూ అర్థశాస్త్రాన్ని బోధించారు.1969 నుంచి 1991 వరకూ ఢిల్లీ  IITలో ఎకనమిక్స్ ఫ్రొఫెసర్‌గా పనిచేశారు. దివంగత మాజీ ప్రధాని చంద్రశేఖర్ హయాంలో క్యాబినెట్ మంత్రిగా న్యాయశాఖ,వాణిజ్యశాఖలను నిర్వర్తించారు. లోక్‌నాయక్ స్వర్గీయ జయప్రకాష్ నారాయణ్ భావజాలాన్ని పుణికిపుచ్చుకుని న్యాయం కోసం అలుపెరుగని పోరాటాలెన్నో చేశారు. న్యాయశాస్త్రం క్షుణ్ణంగా తెలిసినవారు.ఆయన కేసులన్నీ ఆయనే వాదిస్తారు.ఇటీవలే బయటపడి దేశాన్ని ఒక కుదుపు కుదిపి, రాజకీయాల్లో పెనుమార్పులకు కారణమై, తమిళనాట డి.ఎం.కే ప్రభుత్వానికి భరతవాక్యం పలికిన , 2G-స్పెక్ట్రం స్కాంని ఈయనే వెలికితీశారు.



సోనియా గాంధీ పుట్టుపూర్వోత్తరాలు - చదువు 
  • సోనియా గాంధీ అసలు పేరు ఆంటోనియా మైనో. భారతదేశపు పాస్‌పోర్టు కోసం ఆమె దరఖాస్తు చేసుకున్న అప్లికేషన్‌లో ఆమె పేరు అదే. ఆమె తండ్రిగా చెప్పబడుతున్న స్టెఫానో మైనో, హిట్లర్ తరపున యుద్ధం చేసి రష్యాలో యుద్ధఖైదీగా పట్టుబడ్డాడు. జర్మన్‌సైనికులకి హీనపక్షం 20 సంవత్సరాల జైలుశిక్ష విధించి కానీ వదిలిపెట్టని రష్యన్లు స్టెఫానో మైనోని మాత్రం రెండేళ్ళకే విడిచిపెట్టారు.రష్యన్ సీక్రెట్‌సర్వీస్ సంస్థ  KGBలో పనిచేయడానికి ఒప్పుకున్నందుకే అతనిని వదిలేశారని ఆభియోగం. జైలు నుంచి విడుదలైన స్టెఫానో రష్యన్ల మీద మమకారంతోనో మరొక కారణంతోనో పెద్ద కుతురు ఆంటోనియాని సోనియాగా, మరో కూతురు అలెస్సాండ్రాని అనౌష్కగా నామకరణం చేశాడు. సోనియా, అనౌష్క అన్నవి రష్యన్‌జైలులోని మహిళా జైలు వార్డెన్ల పేర్లు. అయితే సోనియా గాంధీ పుట్టేనాటికి స్టెఫానో మైనో రష్యన్‌జైల్లో ఉన్నాడని అతను ఆమె అసలు తండ్రి కాదనే వాదనా ఉంది. తను పుట్టినతేది మీద సోనియాగాంధీకే స్పష్టత లేనట్టుంది. ఒక దాన్లో 1944 అని మరొక దాన్లో 1946 అని ఉంది. 1942 నుంచి 1945 వరకు  స్టెఫానోమైనో జైల్లో ఉన్నాడన్న విషయం బయటపొక్కేసరికి ఆమె జన్మసంవత్సరాన్ని 1946 కి మార్చారు. పార్లమెంటుకు సమర్పించిన డాక్యుమెంట్లలో ఆమె జన్మస్థలం ఒర్బస్సానో గా చెప్పబడితే ఆమె బర్త్ సర్టిఫికేట్లో లుసియానా అని ఉంది.
  • విఖ్యాత లండన్ కేంబ్రిడ్జి విశ్వవిద్యాలయంలో ఇంగ్లీషులో డిప్లొమా చేసినట్లు 2004 రాయ్‌బరేలీ ఎలెక్షన్ అఫిడవిట్‌లో సోనియాగాంధీ పేర్కొన్నారు. అటువంటి పేరుగలిగిన విద్యార్థులెవరూ తమ వద్ద చదువుకోలేదని కేంబ్రిడ్జి విశ్వవిద్యాలయం సుబ్రహ్మణ్యస్వామికి లిఖితపూర్వక సమాధానమిచ్చింది. మరోసారి సమర్పించిన ఎలెక్షన్ అఫిడవిట్‌లో సోనియాగాంధీ ఆ ఊసే ఎత్తలేదు. సుబ్రహ్మణ్యస్వామి సుప్రీంకోర్టుకి వెళ్తే చీఫ్‌జస్టిస్ "స్వామీ విశాల దృక్పథంతో ఆలోచించండి.ఇది చాలా పాతవిషయం" అన్నారు. నిజానికి సోనియాగాంధీ ఐదవతరగతి కంటే ఎక్కువ చదువుకోలేదు.  కేంబ్రిడ్జి టౌన్లో ఇంటిపనులవీ చేసి డబ్బులు సంపాదించడానికి కావలసినంత ఇంగ్లీషు మాత్రం నేర్చుకున్నారు. 
  • కేంబ్రిడ్జి విశ్వవిద్యాలయంలోని రెస్టారెంట్లో వెయిట్రెస్స్‌గా పనిచేస్తున్న కాలంలో 1965లో మొదటిసారిగా రాజీవ్‌గాంధీనీ కలిసింది సోనియా. చదువులో నెగ్గుకురాలేకపోయిన రాజీవ్ లండన్ వెళ్ళి అక్కడ ఇంపీరియల్ కాలేజ్ ఆఫ్ ఇంజనీరింగ్‌లో చేరారు . సోనియా కూడా లండన్ వెళ్ళి అక్కడొక దుకాణంలో పనికి కుదిరింది. ఆ దుకాణం దుబాయ్ కేంద్రంగా ఎగుమతి దిగుమతుల వ్యాపారం చేస్తూ, అధికశాతం లండన్లోనే ఉండే సల్మాన్‌ తస్సీర్ అనే ఒక పాకిస్తానీది. ఇలాంటి వ్యాపారాలు చేసేది ISI వాళ్ళే.    
  • ఖరీదైన జీవనశైలి కారణంగా అప్పులు చేయాల్సి వచ్చిన రాజీవ్‌గాంధీకి సోనియా ఆర్థిక సాయం చేసేది. ఆమె పనిచేస్తున్న సంస్థ ద్వారా ఆమెకు పుష్కలంగా డబ్బుముట్టేది. అదే సొమ్ముని రాజీవ్‌గాంధీ అవసరాల కోసం వినియోగించేదామె. రాజీవ్‌గాంధీ చేస్తున్న దుబారాఖర్చుల గురుంచి సుబ్రహ్మణ్య స్వామితో చెప్పుకొని బాధపడింది ఇందిరాగాంధీ. ఆమె మరో కొడుకు సంజయ్‌గాంధీ యాథాశక్తి డబ్బులు పంపిస్తూ అన్నకి అండగా నిలబడేవారు . 
వివాహం - వివాదాస్పద వ్యవహారాలు
  • కాథొలిక్‌గా మారి సోనియాను సీక్రెట్‌గా చర్చిలో వివాహం చేసుకున్నారు రాజీవ్‌గాంధీ. ఇందిరాగాంధీ దీన్ని తీవ్రంగా వ్యతిరేకించినా, 'భారత్-రష్యాల మధ్యనున్న ద్వైపాక్షిక సంబంధాలు  దెబ్బతినగూడదన్న' T.N.కౌల్ (రష్యాలో భారతరాయబారి) సలహాకు తలొగ్గి చివరకు అంగీకరించాల్సి వచ్చింది. ఆయన మీద KGB ఒత్తిడి పనిచేసిందన్న సంగతి సుస్పష్టం. సోనియా సామాన్య ఇటలీవనితే అయితే 'ఇరుదేశాలు సంబంధాలు దెబ్బతినకూడదని ' ఒక భారత రాయబారి సిఫార్సు చెయ్యాల్సిన అవసరం ఏమిటి?
  • వివాహమయ్యాక సోనియాగాంధీ ప్రభుత్వరంగ సంస్థైన ఓరియంటల్ ఫైర్ అండ్ ఇన్ష్యూరెన్స్ తరపున ఏజెంట్‌గా పనిచేశారు. ప్రధానమంత్రి ఆఫిసును తన చిరునామాగా పేర్కొంటూ అక్కడ పనిచేసే అధికారులను ఇన్ష్యూర్ చేయించేవారు. ఆమె అప్పటికి భారతీయురాలు కాదు.ఒక ఇటాలియన్ వనితగా ఉంటూ అలా చెయ్యడం ఫెరా చట్టాన్ని ఉల్లంఘించడమే అవుతుంది. 19 నవంబరు 1974లో సుబ్రహ్మణ్యస్వామి ఈ విషయాన్ని పార్లమెంటులో లేవనెత్తినప్పుడు పెద్ద రాజకీయ దుమారం చెలరేగింది. ఇందిరాగాంధీ వ్రాతపూర్వకంగా అదంతా నిజమేనని అంగీకరించి ' అది తెలియక చేసిన తప్పిదమని, సోనియా ఇప్పుడా పదవికి రాజీనామా చేశార ' ని తెలిపారు.
  • 1977లో జనతాపార్టీ అధికారంలో కొచ్చింది. సుప్రీంకోర్టు జస్టిస్ A.C.గుప్తా నేతృత్వంలో ఏర్పడ్డ కమీషన్ , అప్పటికి గాంధీ కుటుంబం ఆజమాయిషిలోనున్న మారుతి కంపెనీ  విషయంలో సోనియాగాంధీ ఎనిమిదిచోట్ల ఫెరా నిబంధనలు అతిక్రమించారని ఒక పెద్ద రిపోర్టు తయారు చేసింది. కానీ సోనియాగాంధీ ప్రాసిక్యూట్ చేయబడలేదు. ఇటువంటి కేసులకు కాలపరిమితి లేకపోవటం వల్ల సోనియాను ఇప్పుడు కూడా ప్రాసిక్యూట్ చేయవచ్చు.  
  • 1982లో రాత్రి రెండుగంటల సమయంలో ఢిల్లీ IIT ముఖ్యద్వారం వద్ద దగ్గర జరిగిన ఒక కారు ప్రమాదంలో మాధవరావు సింధియా, సోనియా గాయపడ్డారు. సింధియాతో పాటూ కేవలం సోనియా మాత్రమే కారులో ఉన్నారు. తను హాస్పిటల్‌కి వెళ్ళనని ఆమె మొండికెయ్యటంతో, వారిని కారులోంచి బయటికి లాగిన అక్కడి విద్యార్థి ఆమెను ఆటోలో ఇందిరాగాంధీ ఇంటికి పంపించాడు. సోనియా వెళ్ళిపోయాక రంగప్రవేశం చేసిన పోలీసులు హుటాహుటిన  సింధియాని హాస్పిటల్‌కు తరలించారు.
  • సోనియాగాంధీ గురుంచి కాస్తో కూస్తో తెలిసి అనుమానాలు వ్యక్తం చేసిన అందరూ అనుమానాస్పద ప్రమాదాల్లో మరణించారు. సంజయ్‌గాంధీ, మాధవరావు సింధియా, జితేంద్ర ప్రసాద్, రాజేష్‌ పైలెట్ .. ఇలా అందరూ ప్రమాదాలలో ప్రాణాలు కోల్పోయినవాళ్ళే. సంజయ్‌గాంధీ ప్రమాదానికి గురైన విమానంలో  టేకాఫ్ కు ముందే ఇంధనం పూర్తిగా నింపబడిందని ఫ్లైట్ రిజిస్టర్‌లో ఉంది. కానీ ప్రమాదం జరిగాక విమానం పేలిపోలేదు ఎందుకంటే అందులో ఇంధనం లేదు కాబట్టి. మాధవరావు సింధియాతో పాటూ అదే విమానంలో ప్రయాణం చెయ్యవలసిన షీలా దీక్షిత్, మణిశంకర్ అయ్యర్ చివరి నిమిషంలో తమ ప్రయాణాలని వాయిదా వేసుకున్నారు.
  • ఇందిరాగాంధీని సెక్యూరిటీ గార్డులు కాల్చినప్పుడు, ఆమెను మొదట లోహియా అసుపత్రికి  తరలించమని సోనియాగాంధీ పట్టుబట్టారు. అక్కడికి వెళ్ళాక AIIMSకు తరలించమని  మొండికేశారు. 24 నిమిషాల విలువైన సమయం ఇలా వృథా అయ్యింది. 
  • సోనియాగాంధీకి పాలస్తీనాలోని అతివాద హబాష్ గ్రూపుతో సత్సంబంధాలున్నాయి. దాడుల్లో గాయపడిన కుటుంబాలకు ఆర్థిక సహాయం అందించేదని రాజీవ్‌ గాంధీ, యాసర్ అరాఫత్ సుబ్రహ్మణ్యస్వామికి స్వయంగా చెప్పారు.
  • సోనియాగాంధీకి సద్దాంహుస్సేన్ నుంచి రహస్యంగా నిధులందేవని Reutersలో ఒక కథనం వచ్చింది. 1984 నుంచి ఆమె తన తల్లి పౌలా,సన్నిహితుడు ఒట్టావియో ఖత్రోచి ద్వారా LTTE తో కూడా సంబంధాలు ఏర్పరుచుకొన్నారు. ఖత్రోచి LTTEకి ఆయుధాలు సమకూర్చేవాడు వీరిద్దరి ద్వారా అక్రమ లావాదేవీలు జరిగేవి. సోనియాకు అత్యంత సన్నిహితుడైన అర్జున్‌సింగ్, బెంగుళూరు కేంద్రంగా ఈ వ్యవహారాన్నంతా చక్కబెట్టేవారు .  

  •  ప్రముఖ స్విట్జర్ల్యాండ్ మ్యాగ్‌జైన్  Schweitzer Illustrate  నవంబరు 1991 సంచిక ప్రకారం అప్పటికే రాజీవ్‌ గాంధీ పేరిట స్విస్‌బ్యాంకుల్లో 250 కోట్ల యు.ఎస్ డాలర్లు మూలుగుతున్నాయి. ఆయన మరణాంతరం ఆ సొమ్మంతా సోనియా పరమైనట్లు మ్యాగ్‌జైన్ వెల్లడించింది . ఒక మాఫియా నేత, ఆర్థిక లావాదేవీల విషయమై అమెరికా కూపీలాగి వత్తిడి తెచ్చేసరికి స్విస్ ప్రభుత్వం తన బ్యాంకులలో పెద్ద మొత్తాలలో ధనం దాచుకున్న రహస్య ఖాతాదారుల వివరాలు వెల్లడించవలసి వచ్చింది.ఆ లిస్టులో రాజీవ్‌తో పాటు, సద్దాంహుస్సేన్, ఇండోనేషియా నేత సుహార్తో వంటి ఇతర ప్రముఖులున్నారు. 
  • హార్వర్డ్ నుంచి డాక్టరేట్ పుచ్చుకున్న ఎవ్జీనియా అల్బాట్స్ రష్యాలో ప్రముఖ విద్యావేత్త, జర్నలిస్ట్. KGB వ్యవహారాల దర్యాప్తుకై అప్పటి రష్యా ప్రెసిడెంట్ బోరిస్ ఎల్సిన్ నియమించిన కమీషన్లో్  ఆమె సభ్యురాలు. ఆమె వ్రాసిన పుస్తకం The State Within a State. The KGB in Soviet Union లో సోనియా గాంధీ- KGB మధ్య జరిగిన వ్యాపార లావాదేవీల గురుంచి మిలిటరీ ఇంటెలిజెన్స్ ఫైల్‌నంబర్స్‌తో సహా వివరించారు.1992లో రష్యా ప్రభుత్వం ఈ విషయమై వివరణిస్తూ సోవియట్‌ యూనియన్ సైద్ధాంతిక అవసరాల దృష్ట్యా అవన్నీ అవసరమేనని తన చర్యలను సమర్థించుకుంది.
  • సుబ్రహ్మణ్యస్వామి ఆల్బాట్స్‌ను కలిసి ఆమె ఆ డాక్యుమెంట్లను స్వయంగా చూశారని నిర్థారించుకొని, యూనివర్సిటీ లైబ్రరీ నుంచి వాటిని డౌన్లోడ్ చేసుకుని కోర్టులో కేసు వేశారు.అప్పటి మంత్రి వసుంధరరాజే సింధియా  ఆ కేసును దర్యాప్తు చేయమని సి.బి.ఐ ని ఆదేశిస్తే , కాంగ్రెస్ సభ్యులు పార్లమెంటును స్తంభింపచేసి ఆ ఆదేశాలు రద్దు చేయించారు. రష్యా నుంచి నిజానిజాలు నిర్థారించుకొమ్మని ఢిల్లీ హైకోర్టు  చివాట్లు పెడితే సి.బి.ఐ మూడేళ్ళు కాలయాపన చేసింది. FIR నమోదు చేస్తే రష్యా నుంచి అన్ని ఆధారాలు పొందే అవకాశమున్నా సి.బి.ఐ కానీ, భారత ప్రభుత్వంగానీ ఎటువంటి చర్యలూ తీసుకోలేదు.ఈ కేసును ఎప్పుడైనా తిరగదోడే అవకాశముంది.
  • ఇందిరా గాంధీ, రాజీవ్‌ గాంధీ ప్రధానమంత్రులుగా ఉన్న కాలంలో దాదాపుగా ప్రతీ రోజూ ఢిల్లీ విమానాశ్రాయం నుంచో,చెన్నై విమానాశ్రయం నుంచో భారతదేశ పురాతత్వ సంపద అంతా తరలిపోయేది. ముఖ్యమంత్రిగా కొన్నాళ్ళు, కేంద్రమంత్రిగా కొన్నాళ్ళు పనిచేసిన అర్జున్‌సింగ్ ఈ వ్యవహారాన్నంతా పర్యవేక్షించారు.ఇలా తరలించబడ్డ సంపదనంతా ఇటలీలో సోనియా సోదరి అనౌష్క( అలియాస్ అలెస్సాండ్ర )నిర్వహిస్తున్న ఎత్నిక,గణ్‌పతి అనే రెండు ఆంటిక్‌(Antique) షాపుల్లో ప్రదర్శనకు ఉంచి, తర్వాత నకిలీ బిల్లుల ద్వారా లండన్ పంపించి అక్కడ వేలం వేసి సొమ్ముచేసుకునేవారు. సుబ్రహ్మణ్యస్వామి అభ్యర్థనలని వాజ్‌పేయి ప్రభుత్వం లక్ష్యపెట్టకపోవడంతో ఆయన ఢిల్లీ హైకోర్టులో దావా వేశారు. ఇంటర్‌పోల్, ఇటలీ ప్రభుత్వాల సహాయం తీసుకొమ్మని కోర్టు సి.బి.ఐ ని ఆదేశించింది. ఇంటర్‌పోల్ రెండు భారీ నివేదికలు పంపించింది కానీ వాటిని స్వామికి స్వాధీనం చెయ్యడానికి సి.బి.ఐ నిరాకరించింది. FIR ఫైల్‌చేస్తే సమాచారం అందిస్తామని ఇటలీ ప్రభుత్వం హామీ ఇచ్చింది కానీ అది జరగలేదు . ఈ కేసు ఇంకా నడుస్తోంది. 
  • రాజీవ్‌ గాంధీని మట్టుబెట్టడానికి మైనో కుటుంబమే LTTEకి డబ్బు చెల్లించిందని, దానికి ప్రాథమిక సాక్ష్యాధారాలున్నాయని సంచలనాత్మక అరోపణ చేశారు స్వామి. దీనిపై ఆయనొక పుస్తకం కూడా వ్రాశారు. అప్పటికే స్విస్‌బ్యాంకుల్లో రాజీవ్‌ పేరిట కోట్లాది డాలర్లు మూలుగుతున్నాయి. రాజీవ్‌ కూడా సోనియా వ్యవహారాల పట్ల అసంతృప్తి   వ్యక్తం చేసి వాటికి చెక్‌ పెట్టాలని నిర్ణయించుకున్నారు. అదే విషయం ఆమెకు చెప్పడంతో ఆయన అడ్డు తొలగించుకోవాలని మైనో కుటుంబం నిశ్చయించుకుంది. రాజీవ్‌ని చంపినా సాక్ష్యాధారాలు దొరకకుండా తాము చూసుకుంటామని, ఆ తప్పుని సిక్కుల మీదో మరొకరి మీదో రుద్దుతామని LTTEకి నమ్మబలికింది. అయితే సి.బి.ఐ అధికారి కార్తికేయన్ సమర్ధంగా వ్యవహరించి సుప్రీంకోర్టులో LTTEని దోషిగా నిరూపించగలిగారు. చంద్రశేఖర్ ప్రభుత్వం నియమించిన జె.ఎస్.వర్మ కమిషన్ శ్రీ పెరంబుదూరు భద్రతా వైఫల్యంలో కాంగ్రెస్‌నాయకుల పాత్ర కూడా ఉందని కనుగొంది. ఈ విషయంపై మరింత లోతుగా అధ్యయనం చెయ్యడానికి అనుమతి కోరితే పీ.వీ.ప్రభుత్వం నిరాకరించింది. సోనియా వత్తిడి మేరకు జైన్ కమీషన్ అని మరోక కమీషన్ నియమించి LTTEని కేసునుంచి తప్పించాలని చూసింది కానీ అప్పటికే ట్రయల్‌కోర్టులో LTTE దోషనిరూపణ జరిగిపోవటంతో ఏమీ చెయ్యలేకపోయింది.  
బోఫోర్స్ గురుంచి


  • ఖత్రోచి ఇటలి దేశపు ఆయిల్,గ్యాస్ కంపెని 'ఏని ' యొక్క ఇంజినీరింగ్ విభాగపు ప్రతినిధి.1974లో మొదటిసారిగా రాజీవ్-సోనియాలను కలిశారు.అప్పటినుంచి రాకపోకలు కొనసాగిస్తూ, అనేక బహుమతులిస్తూ ఆ కుటుంబాన్ని మచ్చిక చేసుకున్నారు. క్రమేపీ వాళ్ళ బంధం ధృడమైపోయి, ఆయన పట్టిందల్లా బంగారమైపోయింది.ఖత్రోచి వస్తే ప్రభుత్వాధికారులు లేచి నిల్చుని మర్యాదలు చేసేవారు. గాంధీ కుటుంబంతో ఉన్న సాన్నిహిత్యం కారణంగా 1980-1987 మధ్య కాలంలో 60 ప్రాజెక్టులు సాధించుకోగలిగారు.
  • ఆధునిక ఆయుధాలను సమకూర్చుకోనే ప్రక్రియలో భాగంగా 1984లో శతఘ్నుల టెండర్లను ఆహ్వానించింది భారత సైన్యం.ఫీల్డ్‌లో 29.2 కిలోమిటర్ల రేంజి కవర్ చెయ్యగలిగిన ఫ్రెంచి శతఘ్ని సోఫ్మా సైన్యాన్ని ఆకట్టుకుంది.స్వీడన్ శతఘ్ని బోఫోర్స్ కేవలం 21 కిలోమీటర్ల దూరంలోని లక్ష్యాలనే బేధించగలిగింది. ఖత్రోచి బోఫోర్స్ ఏజెంటుగా రంగప్రవేశం చేసి అక్రమంగా టెండర్లు మార్పించి ఒప్పందం బోఫోర్స్‌కే దక్కేలా చూశారు. ఇందుకుగాను ఆయనకు ముట్టిన ప్రతిఫలం 70 లక్షల డాలర్లు. 'ది హిందు ' దినపత్రిక విలేకరి చిత్రాసుబ్రహ్మణ్యం బోఫోర్స్ మేనేజింగ్ డైరెక్టర్ మార్టిన్ అర్ద్‌బో ప్రైవేట్ డైరిని సంపాదించటంతో వాస్తవాలు వెలుగు చూశాయి. కొన్నాళ్ళ పాటు కథలు కథలుగా ఈ కుంభకోణాన్ని ప్రచురించిన 'ది హిందు ' దినపత్రిక కాంగ్రెస్ వత్తిడికి తట్టుకోలేక ప్రచురణను నిలిపివేసింది. చిత్రాసుబ్రహ్మణ్యం ' ఇండియన్ ఎక్స్‌ప్రెస్‌ ' కు వెళ్ళి అక్కడినుంచి తన పోరాటాన్ని కొనసాగించారు. కుంభకోణం బయటపడిన పదేళ్ళకు గానీ ఖత్రోచి పేరు చార్జిషీటులో చేర్చబడలేదు.1993లో అరెస్టవడానికి సరిగ్గా రెండురోజుల ముందు ఖత్రోచి భరతదేశం వదిలి కౌలాలంపూర్ పారిపోయారు.ప్రభుత్వ పెద్దల పాత్ర లేకపోతే ఇది సాధ్యపడే పనేనా? కుంభకోణం బయటపడిన పదేళ్ళకు,1999లో బి.జే.పి అధికారంలోకి వచ్చాక గానీ ఖత్రోచి పేరు చార్జిషీటులో చేర్చబడలేదు. సి.బి.ఐ. సరైన సాక్ష్యాధారాలు సమర్పించకపోవడంతో ఆయనపై ఉన్న ఆబియోగాలను కోర్టు కొట్టివేసింది. 64కోట్ల ఈ కుంభకోణాన్ని దర్యాప్తు చెయ్యడానికి ఇప్పటి వరకు అయిన ఖర్చు 250 కోట్లు.


2004 నుంచి ఇప్పటివరకు


  • సోనియా గాంధీ ప్రధాని పదవిని వదులుకోవడానికి గల కారణాలు కూడా చెప్పారు స్వామి. భారతీయ పౌరసత్వ చట్టంలోని ప్రొవిషన్ 5 ప్రకారం సోనియా గాంధీ దేశపు అత్యున్నత పీఠం అధిరోహించటానికి వీల్లేదని న్యాయసందేహాలు లేవనెత్తుతూ స్వామి అప్పటి రాష్ట్రపతి అబ్దుల్‌కలాంకు ఒక లేఖ వ్రాశారు. సోనియా గాంధీ అప్పటికే 340 ఎం.పి.లు తననే ప్రధానిగా చెయ్యాలని సిఫార్సు చేస్తున్నట్లు లేఖలు పుట్టించారు.(వాటిలో తనను తానే ప్రధానిగా సిఫార్సు చేస్తున్న లేఖ కూడా ఉండటం దివాళాకోరు రాజకీయ హాస్యానికి పరాకాష్ఠ). ఇక రాష్ట్రపతి నుంచి పిలుపు రావటమే తరువాయి అనుకుంటున్న సమయంలో స్వామి ఉత్తరం అందుకుని ఆయనతో భేటియైన కలాం, సోనియాకు ఫోన్‌ చేసి చావుకబురు చల్లగా చెప్పారు. ప్రధానిగా తానే ప్రమాణస్వీకారం చెయ్యాలని పట్టుబడితే ముందు న్యాయపరమైన అంశాలు నివృత్తి చేసుకోవాల్సి ఉంటుందని, ఆ తర్వాత మరుసటి రోజు తనను కలవొచ్చని చెప్పారు. న్యాయపరంగా వెళ్తే తన ఎంపిక చట్టవ్యతిరేకమవుతుందని గ్రహించిన సోనియా వెనక్కి తగ్గి గత్యంతరం లేని పరిస్థితుల్లో పగ్గాలు మన్మోహన్‌సింగ్‌కు అప్పజెప్పారు.భజనపరులైన మన కాంగ్రెస్ ఎం.పి.లకు విషయం అర్థంగాక కన్నీళ్ళపర్యంతమై ఆమెను అభినవ సీతను, త్యాగశీలిని చేసి ఆకాశానికెత్తేశారు.
  • మన్మోహన్‌సింగ్ ప్రధానయ్యాక అప్పటివరకు ఉన్న రష్యా రాయబారిని వెనక్కి పిలిపించి అతని స్థానంలో 1970ల నాటి ఒక KGB చీఫ్‌ని నియమించింది రష్యా ప్రభుత్వం.
  • 2008లో 2G స్పెక్ట్రం లైసెన్సులను 2001 నాటి ధరలకి అమ్మారు. నిబంధనలు బేఖాతరు చేసి అర్హతలేని కంపెనీలకు కూడా లైసెన్సులు ఇచ్చారు. స్వాన్ టెలికాం, యూనిటెక్ కంపెనీలకు ఈ రంగంలో ముందస్తు అనుభవం లేదు. వాటికీ లైసెన్సులు దక్కాయి. స్వాన్ టెలికాం  45% వాటాను దుబాయ్‌కి చెందిన ఎటిసలాత్‌కు అమ్మింది.ఇది మాఫియా డాన్ దావుద్ఇబ్రహీం అనుచరులది.యూనిటెక్ 60% శాతం వాటాను నార్వేకి చెందిన టెలినార్‌కు అమ్మింది. శివరాజ్‌పాటిల్ మంత్రిగా ఉన్న కాలంలో ఎటువంటి పరిస్థితుల్లో కూడా ఈ కంపెనీని భారతదేశంలో వ్యాపారం చెయ్యడానికి అనుమతించరాదని కేంద్ర హోంశాఖ ఒక నివేదికను తయారుచేసింది. టెలినార్ తన పరికరాలన్నీ చైనా మిలిటరీ నుంచి కొనుగోలు చేస్తుంది. ఇప్పుడు లైసెన్సులు టెలినార్ పరమవ్వటం వలన భవిష్యత్తులో భారత్-చైనా మధ్య యుద్ధం సంభవిస్తే, చైనా తన సాఫ్ట్‌వేర్ ద్వారా సైబర్‌వార్‌కు దిగి కంప్యూటర్లను హ్యాక్ చేసే అవకాశాలున్నాయి. (యూనినార్ మొబైల్ వినియోగదారులూ జాగ్రత్త). ప్రధానమంత్రే ఒకటి రెండు సార్లు హెచ్చరించినా, లక్ష్యపెట్టకుండా కేంద్ర హోంమంత్రి చిదంబరం చేత సంతకాలు పెట్టించుకొని లైసెన్సులు జారీ చేసినందుకు రాజాకు ముట్టిన దక్షిణ 7000కోట్ల రుపాయిలు, కరుణానిధికి సమర్పించిన కానుక 15000 కోట్లు, చిదంబరంకు చదివించిన సొమ్ము 5000 కోట్లు. ఇక ముఖ్య కథానాయిక సోనియాగాంధీకి సమర్పించుకున్న చీరా-సారే ఖర్చు 36,000 కోట్లు. సుబ్రహ్మణ్యస్వామి ప్రధానమంత్రి మన్మోహన్‌సింగ్‌కు ఐదులేఖలు వ్రాశారు. దేనికీ ప్రతిస్పందన రాలేదు. కోర్టులో దావా వేసేసరికి ప్రభుత్వంలో కదలిక వచ్చి తలలు తెగిపడటం మొదలయ్యింది.లైసెన్సుల జారీ ఫైల్‌పై సంతకం పెట్టిన నేరానికి రేప్పొద్దున్న చిదంబరం కూడా జైలుకు వెళ్ళవలసి వస్తే ఆశ్చర్యపోనక్కరలేదు.  
రాహుల్‌ గాంధీ గురుంచి


  • రాహుల్ గాంధీ, ప్రియాంక గాంధీ ఇద్దరికీ ఇటాలియన్ పాస్‌పోర్టులే ఉన్నాయి. పాస్‌పోర్టులో రాహుల్‌గాంధీ పేరు రౌల్ వించిగా నమోదై ఉంది. రాజీవ్‌గాంధీ ప్రధానిగా ఉన్నకాలంలో హిందూజా సోదరులు హార్వర్డ్ మెడికల్‌ కాలేజ్‌కు 11లక్షల డాలర్లు దానం చేశారు. అలా దాతల కోటాలో సీటు దక్కించుకున్న రాహుల్ అక్కడున్న పోటీని తట్టుకోలేక మూడునెలల్లోనే వదిలేశారు. సెయింట్ స్టీఫెన్‌ కాలేజ్‌లో తనను క్రైస్తవుడిగా ప్రకటించుకొని, క్రీడాకారుడి(షూటర్) కోటాలో సీటు పొందారు. అయితే హిందీ పరీక్షలో ఫెయిలయ్యారు. రాహుల్‌గాంధీ ఎం.ఫిల్ చదివారని కాంగ్రెస్‌వాదులు చెబుతారు కానీ ఎం.ఫిల్‌కు ముందు ఎక్కడ ఏం చదివారో ఎవరికీ తెలియదు.
  • రాహుల్‌ గాంధీ హార్వర్డ్‌లో ఉన్న కాలంలో ఆయన ఖర్చుల చెల్లింపులన్నీ కేమన్‌ దీవులలోని అకౌంట్ల ద్వారా జరిగాయి.స్విస్‌బ్యాంకు ఖాతాలలాగే వీటికీ గోప్యత ఎక్కువ.
  • 27 సెప్టంబరు 2001న బోస్టన్ విమానాశ్రయంలో రాహుల్‌ గాంధీని పోలీసులు అరెస్టు చేశారు.అమెరికాలో ప్రవేశించేటప్పుడు పదివేల డాలర్ల కంటే అధికమొత్తంలో ధనం తీసుకువెళ్తూంటే ఆ విషయాన్ని డిక్లరేషన్‌ ఫాంలో ముందే డిక్లేర్ చెయ్యాలి. రాహుల్‌ గాంధీ డిక్లేర్ చెయ్యలేదు.1,60,000 డాలర్లతో తన స్నేహితురాలు వెరోనిక్ కథెలీ సహా దొరికిపోయారు. అతను మాజీ ప్రధాని కుమారుడని మన కమాండోలు విన్నవించుకున్నా FBI ఖాతరు చెయ్యలేదు. తొమ్మిదిగంటల పాటూ వారి కస్టడీలో గడపాల్సి వచ్చింది. చివరికి భారత ప్రభుత్వం స్వయంగా కలుగచేసుకోని కండొలిజా రైస్‌కు పరిస్థితిని విన్నవించి అతన్ని బయటికి తీసుకువచ్చింది. అంత పెద్ద మొత్తం ఆ సమయంలో రాహుల్ దగ్గరెందుకుంది అన్నదాని మీద సరైన సమాధానాలు లేవు. అప్పటి నుంచి రాహుల్‌గాంధీ అమెరికా వెళ్ళిన దాఖలాలు లేవు. అతన్ని ఏ నిమిషమైనా మళ్ళీ పిలిపించుకునే అధికారం FBI కుంది. ఈ కేసు వివరాల కోసం సుబ్రహ్మణ్యస్వామి FBI ని సంప్రదిస్తే, 'ఇది రాహుల్‌ గాంధీ వ్యక్తిగత విషయం కాబట్టి ఆయనకు అభ్యంతరం లేకపోతే తప్పకుండా పంపిస్తా' మని సమాధానం లభించింది. స్వామి ఎన్నో లేఖలు వ్రాశారు కానీ వేటికీ రాహుల్‌ గాంధీ జవాబివ్వలేదు.
  • రాహుల్‌ గాంధీ గర్ల్‌ఫ్రెండ్ వెరోనిక్ కథెలీ స్పెయిన్ దేశస్థురాలు. ఆమె తండ్రికి కొలంబియన్‌ డ్రగ్‌మాఫియాతో సంబంధాలున్నాయి.



19 comments

Post a Comment

విశ్వనాథ సత్యనారాయణ - వేయిపడగలు - విశ్లేషణ


విసామ్రాట్ విశ్వనాథ సత్యనారాయణగారు ఆశువుగా చెబుతూండగా, వారి తమ్ముడు వెంకటేశ్వర్లు గారు వ్రాసిన నవల వేయిపడగలు. కేవలం 29 రోజుల్లో వేయిపేజీల ఉద్గ్రంథాన్ని వెలువరించడం విశ్వనాథ వారి పాండితీ ప్రకర్షకు నిదర్శనం. 1934లో ఆంధ్ర విశ్వవిద్యాలయం వారు నిర్వహించిన పోటీకోసం వ్రాయబడి అడవి బాపిరాజు గారి 'నారాయణరావు'  నవలతో పాటూ ప్రథమ బహుమతి పంచుకున్న ఈ నవల ఆయనకు విశేష ఖ్యాతినార్జించి పెట్టింది. 1968-70ప్రాంతాలలో బహుభాషాకోవిదుడైన దివంగత ప్రధానమంత్రి శ్రీ పి.వి.నరసింహారావు ఈ నవలను  హిందిలోకి అనువదించి కేంద్రసాహిత్య అకాడమీ అవార్డునందుకొన్నారు. ఈ అనువాదం ఆధారంగా నిర్మితమైన 'సహస్రఫణ్ ' అనే ధారావాహిక హిందీ మొదలైన అనేక భారతీయభాషలలో దూరదర్శన్ ద్వారా ప్రసారమైంది.

ఇంతకుముందు వేయిపడగలు కథను సంక్షిప్తంగా మాత్రమే  చెప్పడం జరిగింది.  అది కాక ఎన్నో పిట్టకథలు, సహాయపాత్రలు ఉన్నాయి.  అన్నింటినీ గుదిగుచ్చడం కష్టం కాబట్టి ప్రధానమైన కథనే ఇక్కడ ప్రస్తావించాను.  ఇక్కడ ఒక ఇబ్బంది కూడా ఉంది. ఒకే పేరు గల పాత్రలు, ఒకే అక్షరంతో మొదలయ్యే పాత్రలు నవలలో చాలా ఉన్నాయి. ఉదాహరణకు ధర్మారావు తండ్రి పేరు, కొడుకు పేరు రామేశ్వరమే.  వీళ్ళు కాకుండా ప్రతినాయకులలో ఒకడైన రామేశ్వరం ఉండనే ఉన్నాడు.  ఇంకొన్ని పాత్ర పేర్లు ఇలా ఉన్నాయి రామక్రిష్ణారావు, రంగాజమ్మ, రామచంద్రరాజు, రథంతరి, రుక్మిణమ్మారావు, రాజ్యలక్ష్మి...ఇలా సాగుతుంది వరస.  పొరపాటున మధ్యలో కొన్నిరోజులు విరామం ఇచ్చారంటే మళ్ళీ చదవడం మొదలుపేట్టేటప్పుడు ఎవరు ఎవరో గుర్తురాక గందరగోళానికి గురవ్వక తప్పదు.  కానీ ఒకసారి నవల మీద స్పష్టత వచ్చాక ముఖ్యమైన ప్రతిపాత్రా మనస్సులో గుర్తుండి పోతుంది.  అంత వివరణాత్మకంగా పాత్రలను మలచారు.

వేయిపడగలంటే సనాతన భారతీయ ధర్మాలు సంప్రదాయాలని అర్థం. సుబ్బన్నపేట దేవుడైన సుబ్రహ్మణ్యేశ్వర స్వామి, హర్రప్ప వంశీకులు,ధర్మారావు వంశీకులు, గణాచారి- వీరు నలుగురు ధర్మానికి నాలుగుస్తంభాలుగా నిలిచి ధర్మార్థకామమోక్షాలను పరిరక్షిస్తూ ప్రజలకు ఏ లోటు రాకుండా చూసుకుంటారు. పాశ్చాత్య సంస్కృతికి అలవాటుపడిన రంగారావు ప్రాచీన ధర్మాలకు తిలోదకాలిచ్చి హంగూ ఆర్భాటాలను వంటబట్టించుకొని విచక్షణారహితమైన నిర్ణయాలు తీసుకుని ప్రజాధనం వృధా చేస్తాడు.  ఫలితంగా ఖజానాపై అప్పుల భారం పెరిగి పరిపాలన కుంటుపడుతుంది. కొన్ని వందలఏళ్ళుగా అన్నం పెట్టిన వృత్తివిద్యలు కనుమరుగైపోయి ప్రజలు దిక్కులేనివాళ్ళవుతారు.  విదేశీ విద్యనే మహత్తరమైనదని, స్వజాతి సంస్కృతి ఆచారాలు అనాగరికమనే భావన ప్రబలుతుంది.  ప్రజలందరూ స్వధర్మం మరచిపోయి పరధర్మాల వైపు ఆకర్షితులై, అవే ఉత్తమమని నమ్మి, వాటిని అక్కున చేర్చుకోవటంతో సనాతనధర్మాలకి ప్రతీకైన సుబ్రహ్మణ్యేశ్వరుడు క్రమక్రమంగా తన పడగలన్నీ కోల్పోయి, కళావిహీనమై చివరికి రెండే పడగలతో మిగిలిపోతాడు. ఆ రెండు పడగలే ధర్మారావు, అరుంధతి.

ఇందులో ప్రధానంగా మూడు తరాల జీవన విధానాల్ని, పాశ్చాత్యుల దురాక్రమణ తర్వాత చోటుచేసుకున్న మార్పులు చేర్పులని, తద్వారా ఎదురవుతున్న సమస్యలని చర్చించారు. ఒక రకంగా ఇది విశ్వనాథ సత్యనారాయణ గారి స్వీయచరిత్ర అనుకోవచ్చు. వారి పూర్వీకులు కాశీ వెళ్ళి అక్కడినుంచి శివలింగం తెచ్చి కృష్ణా నదీతీరంలోని ఒక గ్రామంలో ప్రతిష్ఠించారట. అలా ఆ గ్రామం విశ్వనాథపల్లై అదే వారింటి పేరుగా స్థిరపడిపోయింది. ఆ తర్వాత వీరు నందమూరు వలస వచ్చారు. విశ్వనాథవారి నాన్నగారు అక్కడ కూడా కాశీ నుంచి తెప్పించిన శివలింగాన్ని ప్రతిష్ఠించారు. తెలుగు బోధకులుగా విజయవాడ, కరీంనగర్ కళాశాలల్లో పనిచేసిన విశ్వనాథ వేయిపడగలను నవలను కూడా ఆ విశ్వనాథునికే అంకితమిచ్చి తన శివభక్తిని చాటుకున్నారు. వారికి రెండు పెళ్ళిళ్ళయ్యాయి. మొదటి భార్య గతించాక మరో అమ్మాయిని పెళ్ళి చేసుకొని ఆమెను కూడా అదే పేరుతో పిలిచేవారు.

వేయిపడగలులో కథానాయకుడు ధర్మారావు కూడా అంతే. అతను కవి,జాతీయ కళాశాలలో తెలుగు ఉపాధ్యాయుడు. తరతరాలుగా అతని పూర్వీకులు సేవించుకుంటున్న నాగేశ్వరాలయం లోని శివలింగం కాశీ నుంచి తెప్పించి ప్రతిష్ఠించినదే.  తన భార్య చనిపోయాక ధర్మారావు కూడా మరో పెళ్ళిచేసుకుంటాడు. ఆమె పేరు కూడా అరుంధతి. ధర్మారావుకు సనాతనధర్మాల మీద సమున్నత విశ్వాసముంది. వాటికి ఆచరణకు అవరోధాలు కలిగినప్పుడల్లా విలవిలలాడిపోతాడు. స్వతహాగా సాత్వికుడు కానీ తన అభిప్రాయాలను కుండబద్దలు కొట్టినట్లు నిర్మొహమాటంగా వెల్లడించే స్వభావమున్నవాడు. నచ్చకపోతే నచ్చలేదని చెప్పగలడే కానీ, నచ్చనివాటి మీద ఉద్యమాలు లేవదీసి పోరాటాలు చేసే తత్వం అతనికి లేదు. అన్నిటికీ సాక్షీభూతుడు కానీ దేనికీ ప్రత్యక్ష కారకుడు కాదు. Passive hero.

కథానాయిక అరుంధతి భర్తను రెండవ పెళ్ళి చేసుకోమనేటంత ఉదాత్తురాలు.  ప్రాచీన భారతస్త్రీ స్వభావానికి ప్రతీక. దేవదాసి భగవంతున్నే నమ్ముకుని ఆ మూర్తితో వివాహం కోసం పరితపించే పవిత్రమూర్తి. ఈమె పాత్ర సమాజంలో దేవదాసీలంటే ఉన్న చులకనభావాన్ని రూపుమాపి వారి ఔన్నత్యాన్ని చాటిచెప్పడానికే సృష్టించబడిందనుకోవచ్చు. రంగారావు, మంగమ్మ లాంటి వాళ్ళు మొదట కొన్ని వ్యామోహాలకు లొంగినా జీవిత చరమాంకంలో తమ తప్పులు తెలుసుకొని మారిపోతారు. రామేశ్వరం, రాధాపతి, దివాను నాగేశ్వరరావు లాంటి వాళ్ళు పాశ్చాత్య సంసృతిని పూర్తిగా జీర్ణించుకుని పెడత్రోవలు తొక్కి పతనమైపోతారు. ధర్మారావు, అరుంధతి, హర్రప్ప లాంటి వారు ఎన్నిఆటుపోట్లు ఎదురైనా పూర్వాచార పరాయణులుగానే మిగిలిపోతారు.

ఈ పుస్తకం చదువుతూంటే నాకు అప్రయత్నంగా భారత,భాగవతాలు గుర్తొచ్చాయి. అందులో ఉన్నట్లే ఇందులో కూడా ప్రతిపాత్రని వంశవృక్షంతో సహా వివరిస్తూ వెళ్తారు రచయిత. తెరమీది బొమ్మల్లా రకరకాల పాత్రలు వచ్చిపోతూ తమ వ్యక్తిత్వాల ద్వారా మన మనస్సులో స్థానాలేర్పరచుకొని వెళ్తాయి.రామేశ్వరశాస్త్రి దాతృత్వం, రత్నగిరి ఆత్మగౌరవం, లక్ష్మణస్వామి(ఏనుగు)స్వామిభక్తి,నాగేశ్వరశాస్త్రి నక్క వినయం, సుసానీ అవిధేయత చెదరని జ్ఞాపకాలుగా మిగిలిపోతాయి. రాచరికం నుంచి ప్రజాస్వామ్యం వైపు సమాజం పరుగులుపెడుతున్నపుడు, ఆ రథచక్రాల ఇరుసులలో ఇరుక్కొని నలిగిపోయిన సామాన్యుల వెతల్ని చక్కగా ఆవిష్కరించారు. ప్రాచీన కళలపై వీరికున్న అవగాహన అడుగడుగునా ప్రతిఫలిస్తుంది. ముఖ్యంగా నాట్యం గురుంచి, నాటకాల గురుంచి ముద్రలతో సహా వివరిస్తున్నప్పుడు ఆశేషమైన ఆ ప్రతిభా సంపత్తికి ఆశ్చర్యపోకుండా ఉండలేం. ఆయన కలం నుంచి తప్పించుకున్న వస్తువు, వర్ణన లేదేమో? టైంమెషీన్‌లాంటి తన అద్భుతమైన రచనాశైలితో మనల్ని ఒక్కసారిగా మూడువందల ఏళ్ళు వెనక్కి తీసుకెళ్తారు. చూడాలన్న(చదవాలన్న)ఉత్సుకత ఉంటే సున్నితమైన ప్రతి విషయాన్ని మైక్రోస్కోపిక్ వర్ణనలతో దర్శింపచేసి జ్ఞాన పిపాసను తీరుస్తారు. ఆయన సునిశిత పరిశీలనా దృష్టి ఎంతటిదో ఈ క్రింది వాక్యాల ద్వారా తెలియజేస్తాను.


"వర్షము పెద్దది కాజొచ్చెను.ఆ వానకు వడగండ్లు పడెను...ఒక పాము వానలో పరువెత్తుచుండెను. వడగండ్లు దాని శిరస్సును తాడించుచుండెను.అది పడగవిప్పి బుస్సుమనిలేచి ప్రక్కవాటుగా బొంయిమని వీచుచున్న గాలిని కసిగాట్లు కొరికి కష్టము మీద పోవుచుండెను".

వడగళ్ళు తన మీద పడుతూంటే పాము ప్రవర్తన ఎలా ఉంటుందో చూడండి.తననెవరో కసిదీర మోదుతున్నారని పాముకి కోపం.అక్కనా ప్రక్కనా ఎవరూ లేరు.హోరుమని వీస్తున్న గాలే అలా చేస్తూందనుకుందో, లేక తనకొచ్చిన ఉక్రోషాన్ని వెల్లగ్రక్కాలనుకుందో  కసిదీరా కాట్లు వేస్తోందట.

విశ్వనాథ వారు మేఘానికి వృక్షానికి మధ్య కూడా అద్భుతమైన సంబంధాన్ని ఏర్పరిచి హృదయాలకు హత్తుకొనేలా వివరించారు. ప్రతి సంవత్సరం పడమటి కనుమలు, వింధ్యగిరుల నుంచి ' పృషన్నిధి ' అనే నల్లని మేఘం సుబ్బన్నపేట వచ్చి అక్కడున్న నాలుగువందల ఏళ్ళ నాటి ' ఆదివటం ' అనే మహావృక్షాన్ని కలుసుకొని ఆనందభాష్పాలు రాలుస్తుంది. పట్టణీకరణం కారణంగా ఆదివటంతో సహా మహావృక్షాలన్నిటినీ నరికి విద్యుద్దీపాలకు సిమెంటు స్తంభాలను నాటుతారు. ఎప్పటిలాగే మళ్ళీ వచ్చిన పృషన్నిధి తన మిత్రుడైన ఆదివటం కనబడక తల్లడిల్లిపోతుంది. ఒక విద్యుత్‌స్తంభంపై ఆగి తనను కోరతవేసినట్లు బాధపడితే, ఒక ఝంఝూమారుతం వచ్చి దాన్ని నీళ్ళక్కరలేని గుట్టపైకి విసిరికొడుతుంది.

చెప్పుకుంటూ వెళ్తే ఇవే బోలెడున్నాయి. ఆధ్యాత్మిక వర్ణనలలో ఆయన విశ్వరూపం ప్రదర్శిస్తారు. అద్భుతమైన పరిశీలనాదృష్టి, అపారమైన సాహితీశక్తి ఉంటే తప్ప ఇటువంటి ఊహలు కలగవు. అయితే సమాసభూయిష్టమైన కొన్ని వర్ణనల కారణంగా సగటు పాఠకుడికి బోరుకొట్టే ప్రమాదం లేకపోలేదు. ముఖ్యంగా చివరి అధ్యాయాలలో వచ్చే దేవదాసి ధర్మారావుల సంభాషణలు, గీతాలు, పద్యాలు చదివి ఆకళింపు చేసుకోవాలంటే చాలా ఓపిక అవసరం.అలాగే, ఆశువుగా చెబుతూంటే వ్రాసిన నవల కాబట్టి కథనానికి ఏమాత్రం సహాయపడని సన్నివేశాలు కూడా అక్కడక్కడా తగుల్తాయి.

ఈ నవలలో చర్చకు వచ్చిన విషయాలు చాలా ఉన్నాయి. అన్నింటినీ కాకపోయినా కొన్నింటిని వివరిస్తాను.

1. ఇతిహాసాలు,పురాణాలలోని పాత్రలను అభినయిస్తున్నప్పుడు నటీనటుల వస్త్రధారణ హావభావాలు అందుకనుగుణంగా ఉండాలని వ్యాఖ్యానించారు.నారదుడు సామగానం చేస్తే నాటకాలలో భజనగీతాలు పాడుతున్నట్లు చూపిస్తారని,అలాగే శ్రీ కృష్ణుడికి నీలిరంగు బనియను తొడిగి,శిరస్సుపై నెమలిపింఛం పెడతారు గానీ మూతి మీద మీసం మాత్రం ఉంచరని,పాశ్చాత్య నాటకాలు ప్రదర్శిస్తున్నప్పుడు మాత్రం తగు జాగ్రత్తలు తీసుకుంటారని విమర్శిస్తారు.ఈ మాటలతో నేనూ ఏకీభవిస్తాను. పేరుమోసిన పెద్ద పెద్ద నిర్మాతలంతా క్రేజీ కాంబినేషన్ల పేరుతో తలాతోకా లేని సినిమాలు ఏళ్ళ తరబడి తీసి చేతులు కాల్చుకొనే కంటే మన గాథల్లోని సంఘటనలను ఉన్నవి ఉన్నట్లుగా తెరకెక్కిస్తే విజయాల సంగతేమోకానీ కనీసం ఆత్మతృప్తైనా మిగులుతుంది.


2. బాల్యవివాహాలను సమర్థించారు.చిన్నప్పుడే ఆడపిల్లకు తన భర్తెవరో తేలిపోవటం వల్ల అతనిమీదే మనస్సు లగ్నమవుతుందని,పెళ్ళి చిన్నప్పుడే చేసినా కార్యం ఎప్పుడో పదమూడేళ్ళ తర్వాత రజస్వలైన తర్వాతే జరిపిస్తున్నాం కాబట్టి ఇందులో దోషమేమీలేదని వాదించారు.అంతేకాదు మనం చిన్ననాడే గర్భాదానం చేయిస్తున్నామని భ్రమపడి పాశ్చాత్యులు బాల్యవివాహాలను వ్యతిరేకిస్తున్నారని,వారి వాదన సరికాదని విశ్లేషించారు.అయితే బాల్యవివాహాల ద్వారా కలిగే ఇక్కట్లను ఆయన మర్చిపోయినట్లున్నారు. వరుడు, అత్తమామలు మంచివారైతే ఫర్వాలేదు.కొంతలో కొంత నయం.కాకపోతేనే వచ్చింది చిక్కు.అప్రయోజకుడైన భర్తకు సేవలు చేస్తూ,అత్తింటి ఆరళ్ళు భరిస్తూ,తన దౌర్భాగ్యానికి తనను తానే నిందించుకుంటూ పసిప్రాయం నుంచే నరకాన్ని అనుభవించాలి.ఒకవేళ మంచి సంబంధమే దొరికినా హాయిగా ఆడుతూపాడుతూ తిరిగే వయసులో పుట్టెడు చాకిరీలు చెయ్యటం అవసరమా?

3. విగ్రహారాధనను వెనుకేసుకొచ్చారు. నిర్గుణమైన పరబ్రహ్మను సగుణం చేసి ఆరాధిస్తున్నప్పుడు ఒక ఆకృతి అవసరమవుతుందని, ఆ భావాన్నే పూజిస్తున్నామని,హిందువుల దేవుళ్ళు విగ్రహాలైతే, ఫోటోలు, చిత్రాలు, సిలువ
చిహ్నాలు విగ్రహాలు కావా అని ప్రశ్నలు సంధించారు. క్రీస్తును చంపిన సిలువ క్రైస్తవమతానికి చిహ్నమెలా అయ్యిందని నిలదీస్తారు. ఇందులో సత్యం లేకపోలేదు .

4. విధవా వివాహాల మీద కూడా ఆసక్తికరమైన వ్యాఖ్యలు చేశారు. పురుషుడికి ధనముంటే, స్త్రీకి అందముందని, సంఘసంస్కర్తలు కూడా డబ్బు, అందమున్న విధవలనే చూసి పెళ్ళిచేసుకుంటున్నారని, వాటితో నిమిత్తం లేకుండా విధవావివాహాలు జరిగినప్పుడు మంచిదని చెబుతారు.

5. ఇంగ్లీషు చదువుల మీద  అభిప్రాయాలను వెల్లడించారు.పది పదహారేండ్ల వరకూ తెలుగు చక్కగా చెప్పి తర్వాత ఏ భాషైనా బోధించమని,చిన్నప్పటినుండీ ఇంగ్లీషే బోధించటం వలన ఇంగ్లీషు కొంచెం వస్తోంది కానీ,తెలుగేమీ రాకుండా పోతుందని ఆవేదన చెందారు. ఈ గొడవ ఆనాటి(1934) నుంచే ఉన్నట్లుంది. ఇప్పుడున్న పోటీ ప్రపంచంలో ఇంగ్లీషులో అనర్గళంగా మాట్లాడటం తప్పనిసరి కాబట్టి మన నిర్ణయాలని కొంత సమర్థించుకోగలిగినా తెలుగు సరిగ్గా చదవడం, వ్రాయటం రాని తరం తయారవటం మాత్రం నిజంగా దురదృష్టకరం.

6. విడాకుల చట్టాలకు,స్త్రీ సమాజాలకు కూడా తాను వ్యతిరేకినని మంగమ్మ పాత్ర ద్వారా చెప్పిస్తారు. పనులను పంచుకోవాలి కానీ వాటికోసం పోటీపడరాదని, చదువుకున్నంత మాత్రాన స్త్రీ పురుషులిద్దరికీ సమానమైన జ్ఞానముంటుందని భ్రమపడరాదని చెబుతారు. స్త్రీ విద్య గురుంచి మాట్లాడుతూ స్త్రీలను క్రైస్తవ బడుల్లోకి పంపరాదని ధర్మారావు చేత చెప్పిస్తారు. మిషనుస్కూళ్ళలో చదివిన ఆడపిల్లలకు మన సంప్రదాయాలు అలవాటుకాక హైందవ సంస్కృతి నాశనమవుతోందని, గృహదేవతైన ఆమెకు గృహసంబంధమైన మంచిచెడ్డలు తెలియకుండా పోతున్నాయని బాధపడతారు.


వీరి అభిప్రాయాలు కొందరికి విపరీతంలా తోచవచ్చు. చాలా మంది ఏకీభవించలేకపోవచ్చు. రచయితే రాధాపతి పాత్ర ద్వారా చెప్పించినట్లు ఈయనెవరో బి.సి కాలం నాటి వాడని తీసిపారేయవచ్చు. కానీ మూడు దశాబ్దాల కాలంలో మనుషుల్లో,సంఘంలో చోటుచేసుకున్న పరిణామాలకు దర్పణం పట్టిన నవలగా దీన్ని దర్శిస్తే,చరిత్రలో చిరస్థాయిగా నిలిచిపోయే గ్రంథమని ఇట్టే బోధపడుతుంది.

ఒకప్పుడు ఈ నవల విడిగా లభ్యమయ్యేది కాదు.విశ్వనాథ వారి సాహితీసర్వసం(మొత్తం సెట్టు నాలుగువేలకు పైమాటే అనుకుంటా) కొంటే తప్ప విడిగా అమ్మబడదని చెప్పేవారు. నేను కూడా మూడు నాలుగుసార్లు ఆ సమాధానం విని నీరుగారిపోయాను. నా బోటి వాళ్ళను తలచుకోని ఆ నిబంధనను తర్వాత సడలించినట్లున్నారు. ఇప్పుడు విడిగా కూడా లభ్యమవుతోంది.

సాదా ప్రతి వెల 558/-, లైబ్రరీ ప్రతి వెల 1116/-


9 comments

Post a Comment